Sri Aman ulih nyadi palan pengambuh bakat pemain boxing

SRI AMAN, 26 Ogos: Menggeri Sri Aman bepenau dikemansang nyadi ‘kilang’ ngambuh bakat pemain boxing ungkup menua tu,ku Dato Rahman Lariwoo.

Presiden Gerempung Boxing Nengeri Sarawak (SABA) nya madah, tu berindik ari timbal ti chukup manah ari peranak di Sri Aman ngagai main boxing kelimpah udah mega mujur ngadaka pemain boxing profesional iya nya Daelonial Mcdelon tauka Kilat Boy.

“Arapka enggau penatai bala peninju profesional kitu ulih nyadika peransang minat rebak baru di mengeri Sri Aman.

“Bekau ari pekit terubah (diatur), diatu kedua aku beratika mengeri Sri Aman tu bepenau bendar dikemansang nyadi hub (kilang) main boxing nengeri Sarawak,” ku iya.

Iya madah munyi nya ba aum pemberita pengudah tembu Program Bekelala enggau Raban Pemain Boxing Profesional ke bisi ngambi bagi ba Pekit Boxing Tebuka Sarawak diatur ba Stadium Betutup Kompleks Lumba Sri Aman, kemari.

Udah nya, lebuh ditanya bekaul enggau pekit boxing keterubah diatur di Sri Aman, Rahman madahka tu siti agi sejarah baru main boxing mujur digaga di Sri Aman.

“Terima kasih peranak Sri Aman tu kedua kali kitai betemu ba Pekit Boxing Tebuka Sarawak lalu sekali tu kitai mandangka bala pemain boxing profesional ngagai bala mayuh.

“Tu siti sejarah digaga kitai ba mengeri Sri Aman Sarawak laban tu keterubah iya kitai ngatur Pekit Boxing Profesional ba Mengeri Sri Aman,” ku tandu iya.

Ungkup penerang, ba Pekit Kategori Serakup Besai Boxing Asia (ABF) pemain boxing ari Jipun, Toshihiko Era deka besatup enggau pemain boxing Indonesia, Frenky Rohi.

Udah nya, pemain boxing menua, Daelonial Mcdelon tauka Kilat Boy deka besatup enggau Oky Akbar ari Indonesia ba Kategori Super Featherweight.

Semua pekit deka diatur ba Stadium Betutup Kompleks Lumba Sri Aman berengkah ari pukul 8 malam tu legi.

Sama bisi datai ba aum media nya Supervisor Pekit Boxing Tebuka Sarawak 2023 Dr. Nasser Cruz.-TVS