MSSB Sri Aman Ke-57: Champion SMK Engkilili, 46 rikod baru mujur ditempa

Sekula Sekondari (SMK) Engkilili mujur ngetanka gelar champion penuh ba Pekit Olahraga Kaunsil Lumba Sekula Bagi Menua (MSSB) Sri Aman Ke-57.-Foto:TVS

SRI AMAN, 25 Ogos: Kontijen Sekula Sekondari (SMK) Engkilili mujur ngetanka gelar champion penuh ba Pekit Olahraga Kaunsil Lumba Sekula Bagi Menua (MSSB) Sri Aman Ke-57.

Pekit lima hari berunggu ke diatur berengkah 21 nyentuk 25 Ogos ba Kompleks Lumba Sri Aman nya ngemataka raban atlit SMK Engkilili mujur tegumpulka 42 iti midul emas sereta bela 33 iti midul pirak enggau engkeraju.

Lebuh dirandau TVS, Prinsipal SMK Engkilili Dickson Palot Melintan madah, pemujur ke dijapai nya bepun ari pemanah ulah raban nembiak, enti semua ulah nembiak manah, likun semua pengawa deka mujur dikereja magang nyengkaum program diatur sekula baka pengawa lumba.

“Enti disimpul enggau jaku pandak aku ukai semina fokus ba pengawa kurikulum aja, aku berati ari sukut ulah nembiak.

“Semua pemujur iya bepun ari pemanah ulah bala nembiak. Enti ulah nembiak manah, disiplin manah dia semua pengawa dikereja deka mujur magang (nyengkaum pengawa lumba),” ku iya.

Pengajar Dickson madah munyi nya lebuh dipinta meri timbal bekaul engggau pemujur SMK Engkilili ba Pekit Olahraga Kaunsil Lumba Sekula Bagi Menua (MSSB) Sri Aman Ke-57, ngalihari tadi.

Pengawa nangguhka pekit olahraga nya udah dikemujurka Kaban Parlimen Sri Aman Dato Sri Doris Sophia Brodi.

Udah nya, Dickson muji pemujur ke dijapai kontijen SMK Engkilili dalam ngetanka gelar champion ba pekit olahraga nya.

“Pemujur tu kebendar asil pengeransing bala atlit belatih. Sebedau pekit tu diatur kami bisi belatih pengelama tiga minggu laban kami enggai ngachau jam nembiak belajar.

“Sida atlit belatih maya lemai hari sepengudah jam sida abis belajar,” ku iya.

Nya alai, Dickson meri terima kasih ngagai semua sukung semua raban nyengkaum jurulatih, admin sekula laban ke udah bekerejasama nentuka pemujur kontijen SMK Engkilili.

Ngelansa pekara bekaul, Dickson madah diatu SMK Engkilili udah ngembuan perengkaguna ke chukup sereta nadai penimpang baka udah bisi padang, gelanggang basket ball, badminton semua udah bisi magang.

Bekau ari nya, ku iya bala nembiak chukup nyamai belatih enggau ngansah bakat diri.

Ungkup penemu, bisi 46 rikod baru mujur ditempa raban atlit sekula di bagi menua Sri Aman ba pekit olahraga serak tu.

Nangkan SMK Engkilili, penuduk lumur dua Pekit Olahraga MSSB Sri Aman Ke-57 dipenggi SMK Lubok Antu pengudah teulihka 29 midul emas, 34 midul pirak enggau 31 midul engkeraju.

Udah nya, penuduk lumur tiga dipenggi SMK Melugu ke semina bulih 24 midul emas, 20 midul pirak enggau 24 midul engkeraju.

Taun baru gintir SMK Sri aman dipilih nyadi tuai rumah ngatur Pekit Olahraga MSSB Sri Aman Ke-58.-TVS