Program RTP50 pantar dikena Petronas nerenak nembiak rinduka bidang STEEM
Disiarkan pada 09 Aug 2024
Sumber Berita: TVS
SRI AMAN, 8 Ogos: Program Road To Petronas 50 (RTP50) ‘Discover Petronas at School’ iya nya siti inisiatif ke ditempa khas dikena nerenakka semangat belajar ba raban nembiak kelebih agi ungkup bidang Sains, Teknologi, Rampa Menua, Injiniring enggau Matematik (STEEM).
Menijar Besai Kanan Petronas Carigali Sdn Bhd (Sarawak Aset) (SKA) Noriani Yati Mohamad madah, juluk program nya chukup terang iya nya meri peransang enggau negapka runding nembiak, meransang sida ngambika ngembuan juluk ke besai dikena nyapai pemujur jemah ila.
“Siti inisiatif ke ditempa khas dikena nerenak semangat belajar ba raban rebak baru lebih agi ba bidang Sains, Teknologi, Rampa Menua, Injiniring enggau Matematik (STEEM).
“Juluk program tu chukup terang dikena meri peransang ngagai bala anak ke bisi juluk ke tinggi sereta bebendar deka nyapai pemujur dudi hari.
“Ari program tu sida deka diajar chara berunding ke lansik, mutarka penanggul enggau ngelatih sida nyadi ketuai,” ku iya.
Iya mansutka jaku nya maya Program ‘Road To Petronas’ (RTP50) Discover Petronas at School (DPS) diatur ba Diwan Suarah Sri Aman, kemari.
Ku iya, pelajar STEEM chukup beguna dikena nyikap raban nembiak ulih napi pemar dudi hari senutuk enggau guna penemu kemaya hari.
Pia mega ku iya nya dikena nempa raban nembiak ngembuan pengelandik berunding sereta ulih mantu ngemansangka pekara ekonomi enggau rama di menua tu.
Palan keterubah endur ngemujurka program tu iya nya di Labuan sebedau ke mindah ngagai Miri, Sibu, Bintulu enggau Sri Aman sebedau ke ditampung ba Kuching.
Urung 150 iku nembiak ari Sekula Sekondari (SMK) Sri Aman, SMK Lingga, SMK Meligu, SMK Saint Luke enggau SMK Simanggang bisi ngulu program nya ke dipenyadika Sapit Menteri Pelajar, Inovasyen enggau Pemansang Bakat Sarawak Datuk Francis Harden Hollis.-TVS
